ففهمناها لهم لعلهم يعقلون

بعد اللي حصل بالامس من نزول الناس في الشوارع ( ودا أمر غاية في الخطورة ) يتأكدلنا ان الناس فقدت الثقة في حلول الارض فلجأت لله سبحانه وتعالى لفك الكرب وازالة الهم .. الموضوع مرتبط بحالة الرعب والفزع اللي ملت النفوس والشحن السلبي من المسئولين اللي المفروض وبكلمات بسيطة وأفعال واضحة كانوا احتووا الناس .. مابننكرش حالة التأهب اللي حصلت في مؤسسات الدولة والمعاملة الاحترافية مع الاحداث .. بس الناس محتاجة أمل .. محتاجة طاقة نور .. مش وعيد بهلاك مبين .. لجأوا إلى الله لثقتهم فيه وفي انه هو الوحيد اللي بإيده مفتاح النجاة من غير ما يفكرا في عواقب لأنهم في معيته وتحت رعايته فمهمهمش أي شيء غير الاطمئنان باللجوء إليه جماعات مؤتنسين ببعض في انتظار رحمته بإزالة الهم وفك الكرب .. أنا شخصيا أكيد مش مع نزول الناس في الشوارع وتجمعها في الظروف دي - وانا اللي بقللق من اي واحد قرب مني وانا في الشارع - بس نقدر نوجه ارادة الخلاص دي بشكل مدروس وواعي .. فكرة التكاتف والتكامل .. فبجانب التوعية الصحية وجب علينا التوعية الروحية .. ممكن الناس تتجمع بشكل زمني وكل في بيته .. اللي هي الفكرة اللي الكل اتريق عليها باننا بنقلد الغرب في البلكونات - هو انا مش عارف حقيقي الغرب عملوا ايه بنقلدهم عليه - بس ممكن الناس وزي ماحصل بردو يلجأوا إلى الله في اماكنهم من غير ما يخرجوا في تجمعات تنسف كل اجراءات الوقاية واحتواء المرض .. وينادوا بصوت عالي ومحدش يقول بقلبك فالانسان محتاج لتفريغ شحنات سلبية جواه ( غضب ، خوف ، رعب ، ... ) ويبقى تكاتف وتكامل لما نسمع نداء بعض ولجوؤنا لله مجتمعين على امل انه يفك الكرب ويزيل الهم .. ودا تحقيقا لقول الله ( واعتصموا بحبل الله جميعا ولا تفرقوا ) وحديث الرسول ( صلى الله عليه وسلم ) " المؤمن للمؤمن كالبنيان المرصوص يشد بعضه بعضا " فنجتمع بس بشكل عصري وراقي ونبتهل إلى الله جماعات لا فرادى بس كل في مكانه نستأنس ببعض ونشد من أزر بعض .. ومواقع التواصل ليست منا ببعيد .. ماتستهونوش بآلام الناس .. وكفاية شحن سلبي .. وحفظنا الله والعالم أجمع من كل سوء .